MES DE MARÍA NA PARROQUIA DOS TILOS

A Inmaculada por Giovanni Battista Tiepolo

O mes de Maio, mes tipicamente primaveral, é chamado tradicionalmente mes das flores ou mes de María; a razón é que neste mes se remataba facendo unha ofrenda floral a Virxe Nai. Era normal, en case tódalas parroquias, ter no último domingo de Maio, a festa das fillas de María, protagonizada basicamente por poesías declamadas polas nenas e organizada polas mozas da parroquia.

O mes de Maio é tamén o mes do remate pascual coa festa de Pentecoste, precedida pola Ascensión do Señor á casa do Pai.

Aquí, na nosa comunidade galega, tamén é o mes das Letras Galegas, festa da lingua ou festa da identidade dun pobo milenario. Deberiamos recuperar e potenciar a nosa fala, especialmente esquecida nas familias e na relación entre os seus membros: “meu filliño”; “graciñas”; “miña nai”; “boas noites”; “ata mañá”; “un biquiño”; “quérote”, “adeus”, etc. Todas estas expresións teñen moito de profundidade e agradecemento.

O mes de Maio soa tamén a fin de curso, e preinscripción para o seguinte. A formación afecta a tódalas idades e a tódolos ámbitos da persoa. Dentro da nosa axenda para o vindeiro curso non nos esquezamos de adicar un momento á semana para a nosa formación de identidade cristiá. Simplemente é unha posta ó día do noso espírito. A mensaxe de Xesucristo refrixera tódalas dimensións persoais: intelectual, física, social e espiritual.

Preinscríbete na túa parroquia como animador, catequista ou como suxeito-receptor de mensaxe.

Unha aperta.

Benjamín